दोलखामा ‘कोर्ट म्यारिज’प्रति युवाको आकर्षण बढ्दो

राष्ट्रिय खबर

गृहपृष्ठ
राष्ट्रिय खबर

दोलखामा ‘कोर्ट म्यारिज’प्रति युवाको आकर्षण बढ्दो

इ दैनिक सहकर्मी मंगलबार, चैत ३, २०८२

पछिल्लो समय दोलखामा दर्तामार्फत गरिने विवाह अर्थात् ‘कोर्ट म्यारिज’प्रति युवापुस्ताको आकर्षण बढ्दै गएको छ । कानुनी रूपमा सुरक्षित, छरितो र झन्झट कम हुने भएकाले यस्ता विवाहप्रति रुचि बढेको सरोकारवालाहरू बताउँछन् ।

हालै कालिञ्चोक गाउँपालिका–७ का डाक्टर तिब्बिन कुमार शिवाकोटी र भरतपुर महानगरपालिका–१६ की नर्स सुजना रिमालबीच दोलखा जिल्ला अदालतमा दर्तामार्फत् विवाह सम्पन्न भएको छ । दुवै जना स्वास्थ्यकर्मी तथा शिक्षित भएकाले परिवारका सदस्यको उपस्थितिमै कानुनी प्रक्रियाअनुसार विवाह दर्ता गरिएको अधिवक्ता डम्बर प्रसाद ओलीले जानकारी दिनुभयो ।

दोलखा जिल्ला अदालतका नायव सुब्बा राजाराम घिमिरेका अनुसार चालु आर्थिक वर्ष ०८२÷८३ को साउनदेखि फागुन महिनासम्म १५ जोडीले अदालतमार्फत विवाह दर्ता गराएका छन् । यो तथ्यांकले पनि जिल्लामा ८ महिनाको अवधिमा ‘कोर्ट म्यारिज’प्रतिको आकर्षण बढ्दो रहेको देखाउँछ ।

परम्परागत रूपमा सामाजिक रीतिरिवाजअनुसार विवाह गर्ने प्रचलन अझै कायम भए पनि त्यसमा लाग्ने समय, खर्च र प्रक्रियागत झन्झटका कारण युवाहरू कानुनी बाटो रोज्न थालेका छन् । विशेषगरी विदेश जाने तयारीमा रहेका युवायुवतीहरू—जस्तै अमेरिका, अष्ट्रेलिया, क्यानाडा तथा युरोपका मुलुकतर्फ जाने—बीच ‘कोर्ट म्यारिज’ गर्ने प्रवृत्ति उल्लेख्य रूपमा बढेको अधिवक्ता ओली बताउनुहुन्छ ।

कानुनी मान्यता, छिटो प्रक्रिया र आधिकारिक प्रमाणका कारण ‘कोर्ट म्यारिज’लाई आधुनिक र व्यवहारिक विकल्पका रूपमा लिन थालिएको देखिन्छ ।

प्रकाशित मिति: मंगलबार, चैत ३, २०८२ १५:५१

प्रतिक्रिया दिनुहोस्