तेस्रो सन्तान जन्माएमा भीमेश्वर नगरपालिकाबाट १० हजार नगद

भीमेश्वर नगरपालिका

गृहपृष्ठ
भीमेश्वर नगरपालिका

तेस्रो सन्तान जन्माएमा भीमेश्वर नगरपालिकाबाट १० हजार नगद

जीवन लामा आइतबार, वैशाख २१, २०८२

भीमेश्वर नगरपालिकाले जनसंख्या वृद्धि प्रोत्साहनका लागि सञ्चालनमा ल्याएको ‘तेस्रो सन्तान प्रोत्साहन कार्यक्रम’ प्रभावकारी बन्दै गएको छ । नगरपालिकाले आर्थिक वर्ष ०८१÷८२ देखि कार्यान्वयनमा ल्याएको उक्त कार्यक्रमअन्तर्गत तेस्रो सन्तान जन्माउने परिवारलाई १० हजार रुपैयाँ नगद प्रोत्साहन प्रदान गरिँदै आएको छ ।

नगरपालिकाका बालबालिका तथा संघ संस्था शाखा प्रमुख मंगला मानन्धरका अनुसार हालसम्म २१ जनाले विधिवत रूपमा उक्त रकम प्राप्त गरिसकेका छन् । “चालु आर्थिक वर्षमा १० लाख रुपैयाँ विनियोजन गरिएको छ । अझै तीन महिना बाँकी रहेकाले सो अवधिमा थप सेवाग्राही लाभान्वित हुने र कार्यक्रमको लक्षित संख्या पुग्ने अपेक्षा गरिएको छ,” प्रमुख मानन्धरले बताउनुभयो ।

प्रोत्साहन रकम प्राप्त गर्न सेवाग्राहीले निवेदनसहित आवश्यक कागजातहरू— नवजात शिशुको आमाबुबाको नागरिकताको प्रतिलिपि, बसाइँ सराइ प्रमाणपत्र (बसाइँ सरेको भए), नवजात शिशुको र पहिलेका दुई सन्तानको जन्मदर्ता प्रमाणपत्र, सुत्केरी आमा वा शिशुको नाममा खोलिएको बैंक खाताको विवरण र वडा कार्यालयको सिफारिस पेश गर्नुपर्नेछ ।

यसैबीच, भीमेश्वर नगरपालिकाले बागमती प्रदेशको सहयोगमा आमाबुबाविहीन बालबालिकालाई पनि संरक्षण भत्ता दिँदै आएको छ । आर्थिक वर्ष ०७६÷७७ देखि लागू गरिएको योजनाअन्तर्गत पाँच वर्षमाथि र १८ वर्षमुनिका बालबालिकालाई मासिक २ हजार रुपैयाँका दरले भत्ता प्रदान गरिँदै आएको हो । हाल नगर क्षेत्रमा २३ जना बालबालिका संरक्षण भत्ताबाट लाभान्वित छन् ।

प्रकाशित मिति: आइतबार, वैशाख २१, २०८२ १३:०३

प्रतिक्रिया दिनुहोस्