दोलखा चेम्बर अफ कमर्सको सातौँ वार्षिक साधारणसभा

भीमेश्वर नगरपालिका

गृहपृष्ठ
भीमेश्वर नगरपालिका

दोलखा चेम्बर अफ कमर्सको सातौँ वार्षिक साधारणसभा

इ दैनिक सहकर्मी शनिबार, पुस २६, २०८२

दोलखा चेम्बर अफ कमर्सको सातौँ वार्षिक साधारणसभा आज सदरमुकाम चरिकोटमा सम्पन्न भएको छ । उद्योगी तथा व्यवसायीहरूको हक, हित र अधिकारका लागि संगठित चेम्बर अफ कमर्स दोलखाको साधारणसभा विविध कार्यक्रमका साथ सम्पन्न भएको हो ।

२०७४ सालमा स्थापना भएको दोलखा चेम्बर अफ कमर्सले स्थापना कालदेखि नै जिल्लाको आर्थिक चलायमानता, पर्यटन प्रवद्र्धन तथा व्यवसायीहरूको अधिकारका विषयमा निरन्तर आवाज उठाउँदै आएको छ । साधारणसभामा संस्थाका महासचिव रामकृष्ण श्रेष्ठले दोलखाको पर्यटन प्रवद्र्धन र व्यवसायीहरूको अधिकार प्राप्तिका लागि चेम्बरले गर्दै आएका गतिविधिबारे जानकारी गराउनुभयो ।

साधारणसभा दोलखा चेम्बर अफ कमर्सका अध्यक्ष रुद्रजंग बुढाथोकीको अध्यक्षता तथा भीमेश्वर नगरपालिकाका नगर प्रमुख इश्वर नारायण मानन्धरको प्रमुख आतिथ्यतामा सम्पन्न भएको थियो । कार्यक्रममा भीमेश्वर नगरपालिकाकी उपप्रमुख कमला बस्नेत, नेपाल चेम्बर अफ कमर्सका केन्द्रीय सदस्य विष्णु श्रेष्ठ, दोलखा उद्योग वाणिज्य संघका सदस्य रामशरण बस्नेत, नेपाल पत्रकार महासंघ दोलखाका सचिव सुजन काफ्ले र दोलखा चेम्बरका वरिष्ठ उपाध्यक्ष पुरुषोत्तम ठकुरीले आ–आफ्ना धारणा राख्नुभएको थियो ।

साधारणसभामा एक वर्षको अवधिमा संस्थाले सञ्चालन गरेका गतिविधिहरु समेटिएको प्रगति प्रतिवेदन कृष्ण नेपालीले प्रस्तुत गर्नुभएको थियो भने आर्थिक प्रतिवेदन भरत बस्नेतले प्रस्तुत गर्नुभएको थियो ।

कार्यक्रमका प्रमुख अतिथि नगर प्रमुख इश्वर नारायण मानन्धरले जिल्ला तथा नगरपालिकाको समग्र विकासका लागि सार्वजनिक र निजी क्षेत्रबीच सहकार्य आवश्यक रहेको बताउनुभयो । सरकारले मात्र सबै विकासका काम गर्न नसक्ने भएकाले निजी क्षेत्रको भूमिका महत्वपूर्ण हुने उहाँको भनाइ थियो । आफ्नो कार्यकाल करिब चार वर्ष पूरा हुन लागेको उल्लेख गर्दै बाँकी अवधिमा नगरपालिकामा देखिने खालका विकासका काम गर्ने विश्वास समेत उहाँले व्यक्त गर्नुभयो ।

प्रकाशित मिति: शनिबार, पुस २६, २०८२ १६:१७

प्रतिक्रिया दिनुहोस्