सोक्ला भ्यालीमा फागुन ३ गते बोम्बो सम्मेलन तथा सांस्कृतिक मेला

भीमेश्वर नगरपालिका

गृहपृष्ठ
भीमेश्वर नगरपालिका

सोक्ला भ्यालीमा फागुन ३ गते बोम्बो सम्मेलन तथा सांस्कृतिक मेला

इ दैनिक सहकर्मी बुधबार, माघ २९, २०८२

दोलखाको भीमेश्वर नगरपालिका–२ स्थित रमणीय सोक्ला भ्यालीमा आगामी फागुन ३ गते शिवरात्रिको अवसर पारेर बोम्बो (झाँक्री) सम्मेलन तथा सांस्कृतिक मेला आयोजना हुने भएको छ । लोपोन्मुख अवस्थामा पुगेको बोम्बो परम्पराको संरक्षण र प्रवद्र्धन गर्ने उद्देश्यसहित सम्मेलन गर्न लागिएको हो ।

सोक्लाश्वरी पर्यटन विकास समाजको आयोजनामा हुन लागेको एकदिने कार्यक्रममा काठमाडौं, काभ्रे, सिन्धुपाल्चोक, मकवानपुरलगायत विभिन्न जिल्लाबाट बोम्बोहरूको सहभागिता रहने आयोजकले जनाएको छ । सम्मेलनलाई सामाजिक, धार्मिक तथा सांस्कृतिक पर्वका रूपमा मनाउने तयारी गरिएको छ ।

समाजका अध्यक्ष अर्जुन पाख्रिनका अनुसार परम्परागत झाँक्री संस्कृतिलाई जगेर्ना गर्दै नयाँ पुस्तामा यसको महत्वबारे जानकारी गराउने लक्ष्यका साथ कार्यक्रम आयोजना गरिएको हो । “बोम्बो संस्कृति हाम्रो मौलिक पहिचान हो, यसको संरक्षण आजको आवश्यकता हो,” उहाँले बताउनुुभयो ।

आयोजक समितिका अनुसार सम्मेलनले सोक्ला भ्यालीको सांस्कृतिक तथा धार्मिक पर्यटन प्रवद्र्धनमा महत्वपूर्ण टेवा पु¥याउने विश्वास लिइएको छ । कार्यक्रममा झाँक्रीहरूको परम्परागत विधि–विधान, प्रस्तुति तथा सांस्कृतिक झाँकीसमेत प्रदर्शन गरिने जनाइएको छ । सोक्लाश्वरी पर्यटन विकास समाजले यसअघि पनि क्षेत्रको पर्यटन विकास र सांस्कृतिक संरक्षणका लागि विविध कार्यक्रम तथा गतिविधि सञ्चालन गर्दै आएको छ । सम्मेलनले स्थानीय पहिचानलाई थप सशक्त बनाउने अपेक्षा गरिएको छ ।

प्रकाशित मिति: बुधबार, माघ २९, २०८२ १५:५१

प्रतिक्रिया दिनुहोस्