दोलखा–सिंगटी सडक अवरुद्ध हुँदा जनजीवन प्रभावित

कालिन्चोक गाउँपालिका

गृहपृष्ठ
कालिन्चोक गाउँपालिका

दोलखा–सिंगटी सडक अवरुद्ध हुँदा जनजीवन प्रभावित

इ दैनिक सहकर्मी आइतबार, साउन २७, २०८१

झमार्सी पुलनजिक गएको पहिरोले दोलखा–सिंगटी सडक अवरुद्ध हुँदा उत्तरी क्षेत्रका तीन गाउँपालिकाका बासिन्दाको जनजीवन प्रत्यक्ष प्रभावित बनेको छ । उत्तरी क्षेत्रको लाइफलाइन मानिने दोलखा–सिंगटी सडक पहिरोले दुई सातादेखि अवरुद्ध हुँदा जनजीवन प्रभावित भएको हो ।

चरिकोटबाट कालिञ्चोक गाउँपालिकाहुँदै विगु र गौरीशंकर गाउँपालिका जाने सवारीसाधन पूर्ण रूपमा ठप्प भएको छ । यातायातका कुनै पनि सवारी साधन नचलेपछि त्यस क्षेत्रका स्थानीयहरूको जनजीवन कष्टकर बन्दै गएको छ । पहिरोकै कारण यस भेगका २२ वडाका करिव ५० हजार स्थानीयको जनजीवन प्रभावित बनेको कालिञ्चोक गाउँपालिका–४ का वडाअध्यक्ष दिपक खुलालले बताउनु भयो ।

अहिले काठमाडौ र चरिकोटबाट यात्रु तथा सामान लिएर हिडेका सवारीसाधनले झमार्सीमा पुगेपछि अर्को गाडी प्रयोग गरेर आवतजावत गर्नुपर्ने बाध्यता खेप्दै आएको छ । यस क्षेत्रमा निर्माणधीन जलविद्युत् आयोजनाको ढुवानी पनि पूर्ण रूपमा प्रभावित बनेको छ । पहिरोले सडक अवरुद्ध भएपछि आयोजना निमार्णको काम समेत प्रभावित भएको छ । एम्बुलेन्सले समेत वैकल्पिक रूपमा बिरामीलाई झमार्सीमा यात्रीहरू साटासाट गरेर स्वास्थ्य संस्था लैजाने गरेका छन् । झमार्सीबाट मोटरसाईकलबाहेक अन्य सबै सवारीसाधन पूर्ण रूपमा बन्द भएका छन् ।

यही भदौ ५ गतेभित्र अस्थायी रुपमा सडक खुलाउनको लागि निरन्तर निर्माण कार्य भइरहेको डिभिजन सडक कार्यालय दोलखाका इन्जिनियर भरत श्रेष्ठले बताउनुभयो । सडक खुलाउन फास्टट्रयाकमा ठेक्का आव्हान गरेको बोलपत्र कबोल गराएर १५ दिनको समयसीमामा सडक खुलाउने गरी निर्माण व्यवसायीले काम थालिसकेको इन्जिनियर श्रेष्ठको भनाइ छ । त्यस्तै छिटोभन्दा छिटो सडक निमार्ण गर्नको लागि कालिञ्चोक गाउँपालिकाले ढुंगा, जनशक्ति सबै प्रयोग गर्नको लागि पहल गरिरहेको कालिञ्चोक गाउँपालिका उपाध्यक्ष कुल बहादुर बुढाथोकीले बताउनु भयो ।

प्रकाशित मिति: आइतबार, साउन २७, २०८१ १७:४२

प्रतिक्रिया दिनुहोस्