मेलुङ गाउँपालिकाको सार्वजनिक सुनुवाइ

मेलुङ गाउँपालिका

गृहपृष्ठ
मेलुङ गाउँपालिका

मेलुङ गाउँपालिकाको सार्वजनिक सुनुवाइ

इ दैनिक सहकर्मी बिहीबार, असार २१, २०८०

दोलखाको मेलुङ गाउँपालिकाद्धारा आ.व. २०७९/०८० मा सम्पादन गरेको सेवा तथा बिकास निर्माण कार्यको सार्बजनिक सुनुवाइ सम्पन्न गरिएको छ ।
   सार्वजनिक सुनुवाइ कार्यक्रम मेलुङ गाउँपालिका अध्यक्ष हिरा कुमार थोकरको अध्यक्षतामा भएको थियोे भने पालिकाको उपाध्यक्ष गायत्री आचार्य, प्रमुख प्रशासकीय अधिकृत सञ्जय शिवाकोटी, वडा अध्यक्षहरु, कार्यपालिका सदस्य, वडा सदस्य, तथा पालिकाका विभिन्न शाखा प्रमुख तथा कर्मचारीहरु जवाफदेहिता वक्ताको रुपमा र सर्वसाधारणको उपस्थिति रहेका थिए ।
   मेलुङ गाउँपालिकाको आ.व.०७९÷०८० को आय व्ययको विवरण पालिका प्रमुख प्रशासकीय अधिकृत सञ्जय शिवाकोटीले प्रस्तुत गर्नु भएको थियो । जसमा आ.व.०७९/०८० को आय (संघीय सरकार, प्रदेश सरकार, राजस्व बाँडफाँड तथा आन्तरिक श्रोत समेत) कुल जम्मा ६० करोड ८७ लाख ९५ हजार र कुल व्यय ( पुजिगत र चालू) ४७ करोड ७ लाख २७ हजार ५८१ रुपैयाँ अर्थात ७७.३२ प्रतिशत खर्च प्रगति भएको छ । खर्चको क्षेत्रगत तहमा हेर्दा शिक्षा, युवा तथा खेलकुद, उर्जा कानुन तथा न्याय र श्रम तथा रोजगारतर्फ विनियोजित रकमको ९० प्रतिसत भन्दा बढी रकम खर्च भएको छ भने सबै भन्दा कम खर्च शासन प्रणाली विकासमा ३३.३३ प्रतिशत मात्र खर्च भएको जानकारी दिएका थिए ।
   त्यस्तै पुँजिगत तर्फको विकास निर्माणको सबैभन्दा बढी रकम भौतिक पूर्वधार विकासमा १९ करोड १७ लाख ७६ हजार विनियोजित भएकोमा ७४.१५% अर्थात १४ करोड २१ लाख ९७ हजार ७१८ रुपैयाँ खर्च भएको छ । जुन गत चालु आ वको तुलनामा निकै राम्रो खर्च प्रगतिको रुपमा लिएको प्रवक्ता नवराज खड्काले बताउनु भयो ।
   सार्वजनिक सुनुवाइमा सहभागीबाट उठेको प्रश्नको जवाफ दिदै पालिका अध्यक्ष हिरा थोकरले मेलुङ गाउँपालिकालाई स्थानीय सरकार सञ्चालन ऐन, प्रचलित कानुन, नीति र विधि अनुसार सञ्चालन गरि सबैलाई सुशासनको प्रत्याभूति हुनेगरी जवाफदेहिपूर्ण तरिकाले गाउँपालिका सञ्चालन गरिने प्रतिवद्धतासमेत व्यक्त गर्नु भएको थियो ।

प्रकाशित मिति: बिहीबार, असार २१, २०८० ११:१५

प्रतिक्रिया दिनुहोस्