च्छोरोल्पा घुम्न जाने पर्यटकमा वृद्धि

गौरीशंकर गाउँपालिका

गृहपृष्ठ
गौरीशंकर गाउँपालिका

च्छोरोल्पा घुम्न जाने पर्यटकमा वृद्धि

इ दैनिक सहकर्मी बिहीबार, कात्तिक १६, २०८०

दोलखाको गौरीशंकर गाउँपालिका वडा नं. ९ गौरीशंकरमा अवस्थित च्छोरोल्पा हिमताल घुम्न जाने आन्तरिक पर्यटकको संख्यामा वृद्धि आएको छ । दशैंको विदामा ट्रेकिङ जाने क्रममा च्छोरोल्पा हिमताल पनि धेरैको गन्तव्य बन्न थालेका छन् । दैनिक सात सयभन्दा बढी पर्यटक च्छोरोल्पा घुम्न जान थालेका छन् ।
   काठमाडौबाट छोटो दुरीमा पर्ने र पदमार्ग सजिला भएकाले पनि पर्यटकहरु बढी च्छोरोल्पा मन पराउन थालेको गौरीशंकर गाउँपालिका वडा नं. ९ का वडाअध्यक्ष ङिमागेली शेर्पाले बताउनु भयो । चरिकोटबाट छ्योत्छ्योतसम्म गाडीमा र त्यहाँबाट हिडेर सिमीगाउँहुँदै च्छोरोल्पा पुगेर ४ दिनमै फर्किन सकिन्छ । यस पदमार्ग २०७२ सालको भूकम्पपछि स्वीस सरकारले पक्की र आकर्षक बाटो बनाएको छ । अन्य गन्तव्यभन्दा यस क्षेत्रमा रहेका होटलहरुको मेनु सस्तो रहेकाले पर्यटकको संख्यामा वृद्धि आउन सक्ने पहिलोपटक च्छोरोल्पा पुगेका मिलीजुली कालिञ्चोक साकोसका अध्यक्ष नारायण श्रेष्ठले बताउनु भयो । होटल व्यवसायीहरुका व्यवहार अतिनै राम्रो र सस्तो मेनु भएकाले पनि च्छोरोल्पा धेरैको गन्तव्य बन्न थालेको अध्यक्ष श्रेष्ठले बताउनु भयो ।
   दशैं तिहारको विदालाई सदुपयोग गर्न र बढी ट्रेकिङ रुचाउने साहित्यकार तथा लेखक कुमारी लामा पनि भर्खर च्छोरोल्पा पुगेर फर्केका छन् । नेपालको अन्य गन्तव्यभन्दा यस क्षेत्रको पदमार्ग आकर्षक र सुन्दर रहेकाले पनि आफूले विदामा च्छोरोल्पा आएको लामाले बताउनु भयो । त्यस्तै भर्खर च्छोरोल्पा पुगेका श्रमाटन पुस्तकका लेखक बीएन जोशीलाई पनि च्छोरोल्पा प्राकृतिक सुन्दरताले भरिपूर्ण भएकाले दशैंको विदामा पहिलो रोजाई च्छोरोल्पा रहेको बताउनु भयो ।
   च्छोरोल्पा पुग्नको लागि सिमीगाउँ, सुर्मुचे, डोङाङ, वेदिङ, नागाउँहुँदै च्छोरोल्पा पुग्न सकिन्छ । यस हिमताल ४५८० मिटर उचाईमा रहेको छ ।

प्रकाशित मिति: बिहीबार, कात्तिक १६, २०८० १३:४७

प्रतिक्रिया दिनुहोस्