नेपाल आदिवासी जनजाति महासंघ (नेफिन) को ११ औँ राष्ट्रिय महाधिवेशनमा दोलखाका आङपासाङ शेर्पा खुला उपाध्यक्ष पदका लागि बलियो दाबेदारका रूपमा उभिएका छन् । चुनावी सरगर्मी चुलिँदै जाँदा शेर्पाको चर्चा र सम्भावना दुवै उल्लेख्य रूपमा बढ्दै गएको देखिन्छ ।
महासंघले नयाँ नेतृत्व चयन गर्ने प्रक्रिया अन्तिम चरणमा पुगेको सन्दर्भमा खुला उपाध्यक्ष पदका लागि शेर्पाको नाम अग्रपंक्तिमा रहनुले उनको प्रभाव र संगठनभित्रको पकड स्पष्ट देखाउँछ । दोलखाको जिरी नगरपालिकामा जन्मिएका शेर्पा महासंघका निवर्तमान सचिव हुन् । विद्यार्थी राजनीतिबाट उदाएका उनी लामो समयदेखि आदिवासी जनजातिको पहिचान, अधिकार र आन्दोलनसँग सक्रिय रूपमा जोडिँदै आएका छन् ।
विशेषगरी, नेपाल शेर्पा संघले उनलाई मताधिकारसहितको प्रतिनिधि बनाउँदै पदाधिकारीमा अघि सार्ने निर्णय गरेपछि उनको उम्मेदवारी थप मजबुत बनेको छ । यस निर्णयले संगठनभित्र मात्र होइन, व्यापक जनजाति वृत्तमा समेत सकारात्मक सन्देश प्रवाह गरेको छ ।
यही चैत ५ गते प्रज्ञा भवनमा उदघाटन भएको महाधिवेशनको बन्दसत्र हाल स्टार ब्याङ्केटमा जारी छ । नेतृत्व चयनका लागि भइरहेको छलफल र सहमति प्रयासबीच उपाध्यक्ष पदमा शेर्पाको सम्भावना अझै सुदृढ बन्दै गएको छ ।
अध्यक्ष पदतर्फ भने बागमती प्रदेशका पूर्वस्वास्थ्यमन्त्री निमा लामा अग्रपंक्तिमा देखिएका छन् ।
समग्रमा, संगठनभित्रको अनुभव, जनजाति आन्दोलनमा निरन्तर सक्रियता र संस्थागत समर्थनका कारण आङपासाङ शेर्पा खुला उपाध्यक्ष पदका एक प्रमुख प्रतिस्पर्धीका रूपमा स्थापित भएका छन् ।
