भाँचिएको पुल अझै बनेन

शैलुंग गाउपालिका

गृहपृष्ठ
शैलुंग गाउपालिका

भाँचिएको पुल अझै बनेन जोखिम मोलेर नै पुल तरेर बारी पारी गर्न बाध्य

शिबकुमार भुजेल बिहीबार, असोज ८, २०७७

चरिकोट, ८ असोज

शैलुङ गाउँपालिकाको वडा नम्बर सात फस्कू साउँते र मेलुङ गाउँपालिकाको वडा नम्बर एक पवटी सिम्टेको सिमानाको अंधेरी खोलामा रहेको सिमेन्टको पक्की पुल भाँचिएको एक वर्ष वित्दा पनि बन्न सकेको छैन ।

गत वर्ष साउन महिनामा खोलामा आएको ठूलो बाढी र पवटी सिम्टे तर्फको पुलको जीप भन्दा माथि बाट आएको पहिरोको कारण उक्त पुल भाँचिएको थियो । पुल भाँचिए पछि अहिले पुल ठाडो अवस्थामा रहेको छ । विगत एक वर्ष देखि बाटो हिड्ने बटुवाहरु त्यहि ठाडो परेर रहेको पुल बाट नै जोखिम मोलेर हिडिरहेका छन भने साउँते वस्तिका किसानहरु पनि उक्त पुल बाटै घाँस दाउरा बोकेर हिडिरहेका छन । त्यस्तै पवटी सिम्टे बाट फस्कू साउँतेमा रहेको भद्रेश्वर निमावि र साउँते माविमा अध्ययन गर्न जाने विद्यार्थीहरु र पवटी बाट साउँतेमा रहेको भद्रेश्वर कृषि सहकारीमा बचत तथा ऋण कारोवार गर्न जाने सदस्यहरु पनि त्यहि भाँचिएकै पुल बाट नै ओहोर दोहोर गर्न वाध्य भएका छन ।

देश संघियतामा जानु भन्दा पहिले साविक फस्कू गाविसको आर्थिक सहयोगमा उक्त पक्कि पुल बनेको हो । खोलामा आएको बाढी र पहिरोको कारण पुल भाँचिएर ठाडो परेपछि वर्षातको समयमा आफ्रनो ज्यान माया मारेर नै मानिसहरु जोखिम मोलेर नै पुल तरेर बारी पारी गरिरहेका छन । खोलामा बाढी आएको बेलामा भने ज्यान माया मारेर नै घाँसको भारी बोकेर पुल बाट हिड्न परेको साउँते बस्तिका धेरै कृषक महिलाहरुको गुनासो रहेको छ । पुल भाँचिएपछि पुल मर्मत तथा पुनः निर्माणको लागि शैलुङ गाउँपालिका र वडा पालिकामा कुरा राख्दा कुनै सुनुवाई नभएको साउँतेका कृषक केशब बुढाथोकीले बताउनु भयो ।

भाँचिएको उक्त पुल बाट बाटो हिड्ने बटुवा, घाँस दाउरा गर्ने, खेतमा आवत जावत गर्ने, विद्यालयमा जाने विद्यार्थीहरु गरि दैनिक एक सय भन्दा बढि मानिसहरु आवत जावत गर्ने उक्त पुल भाँचिएको एक वर्ष वित्दा पनि पुल बनाउने तिर दुवै तर्फका स्थानिय सरकार लगायत अन्य कोही कसैको ध्यान गएको देखिदैन ।

प्रकाशित मिति: बिहीबार, असोज ८, २०७७ १६:५६